(Кыргыз) Фоточек: Падыша-замбиректи вагон аянтчада башка аскерий техникалар менен чогуу ташып баратышабы?

Sorry, this entry is only available in Кыргыз and Русский.

Коомдук тармактарда башка аскердик техникалардын арасында вагондук аянтчада (транспортёрдо) ташылып бараткан орустардын атактуу Падыша-замбирегинин сүрөтү таркатылууда.

Factcheck.kg редакциясы бул сүрөттүн аныктыгын текшерди.

Сүрөттү чоңойткондо фотошоптун издери жакшы байкалды.

Сүрөт боюнча издөө сүрөттүн оригиналын табууга мүмкүндүк берди. Бул сүрөт 2021-жылы коомдук тармактарда жарыяланган видеодон скриншот экени белгилүү болду. Башында вагон аянтчада ракеталык комплекс жайгашкан болчу.

Скриншот 2021-жылдын 3-апрелинде Dailymail сайтында жарыяланган. Материалда орус аскер техникаларынын Украина менен чектеш аймактарга ташылып жатканы айтылган.

Эскерте кетсек, Падыша-замбирек курал жасоо өнөрүнүн эң көрүнүктүү чыгармаларынын бири болуп эсептелет. Аны 1586-жылы падыша Федор Ивановичтин буйругу менен Москвадагы Замбирек сарайында ордо устасы Андрей Чохов жасаган. Анын калибри 890 мм түзөт. Ал дүйнөдөгү эң чоң замбирек болуп эсептелет, ошондуктан аны Падыша-замбирек деп атай башташкан. Анын салмагы 40 тоннага чукулдап барат. Замбиректин колодон жасалган стволу ар түрдүү фигуралар, оюм-чийимдер, жазуулар жана падыша Федор Ивановичтин атчан фигурасы менен кооздолгон.

Тыянак: калп. Оригинал сүрөттө замбиректин ордунда вагон аянтчада ракеталык комплекс болгон.