Индияда «сабалган» мусулмандар тууралуу тасманы текшеребиз

Социалдык тармактарда ур-токмокко алынган адамдар тууралуу тасма жарыяланды. Видеонун мүнөздөмөсүндө мусулмандар Индиядада сабалды деп айтылат.

Factcheck.kg видео качан жарык көргөнүн жана анда кимдер тартылганын териштирди.

Алгач тасмадан бир кадр алып, ал аркылуу издөө салабыз.

Биринчилерден болуп 2019-жылдын 17-декабрында жүктөлгөн ютуб порталындагы шилтеме ачылат. Бирок, анда экрандан бөлөк тасма  тартылганын көрсө болот.

Биринчи кадрда тиешелүү аккаунттун Фейсбуктагы баракчасын табабыз жана видео кеминде 2 жыл мурун же 2018-жылдын 7-январынан кеч эмес жүктөлгөнүн аныктайбыз. Жогорудагы маалымат аркылуу соц. тармактагы тиешелүү постту табабыз.

Андан соң, тасма кай жерде тартылганын аныктап билүүбүз зарыл.

Видеодогу полиция кызматкерлеринин кийиминдеги жазууга көңүл бурабыз.

RAB деп издөө салсак, Rapid Action Battalion — Бангладештеги кылмыш менен күрөшүүчү атайын элиталык кызмат экенин аныктап чыгабыз.

Тасмадан дагы бир кадр алып, издөө салсак, анын качан жана кай жерде тартылганын толук биле алабыз.

Сол тарапта тасмадан бир кадр, ал эми оң тарапта полиция рейдинин жыйынтыгын чагылдырган көрүнүш. Рейд 2013-жылы Даккада Hifazat-e-Islam Bangladesh исламисттик тобуна каршы жүргөн.

Убагында бул окуя тууралуу BBC кабарлаган.

Жыйынтык: Фейк. Тасма Индияда эмес, Бангладеште 2013-жылы  рейд учурунда тартылган.