Баланы тумчуктурган тарбиячы жөнүндө видео кайрадан жайылды

Социалдык тармактарда бала бакчалардын биринде тарбиячы жаш баланы тумчуктурган видеотасма тарады.  Окурманыбыз бул тасманы текшерүү өтүнүчү менен редакцияга кайрылды. 

Factcheck.kg видеону текшерип, ал 2018-жылы Казакстанда тартылганын аныктады. 

50 жаштагы тарбиячынын аты Умит Пирмаханова. Ал Темиртаудагы “Домик” бала бакчасында иштеген. Коомчулукта кызуу талкуу жараткан тасма 2018-жылы россиялык “Мужское/Женское” (“Первый канал”) телеберүүсүндө көрсөтүлгөн.

 

Учурда Кыргызстандын интернет айдыңында бул тасма кайрадан жайылды. Эске салсак, 2020-жылдын февраль айында ал биринчи ирет тараган эле. Анда дагы колдонуучулар тарбиячынын жазасын талап кылган. 

2018-жылы Пирмахановага сот өкүмү чыгарылып, 120 саат түзөтүү жумуштары дайындалган, ошондой эле жабыркаган кыздын үй-бүлөсүнө 200 миң теңге (ошол кездеги курс боюнча 532 доллар) төлөнгөн.

Жыйынтык:  Тасма 2018-жылы Казакстанда тартылган жана анын Кыргызстанга тиешеси жок.